Riflessioni del 27/05/2008
Inteligense
Lo gò za dito tenpo indrìo: ormai ze tuto un fiorire de inteligense: ghe ze quela artificiale dei conpiuter e dei robò, po’ ghe ze quela dei missili e bonbe (cosideti inteligenti!), e infin quela dele màchine in genere… Insoma ze tuto un parlare de inteligense. E tuto questo par otegnere trapeli e casini vari senpre più conpagni al’omo umano. Ghe ze però un picolo problema: se proprio proprio volemo che i vari atressi ne someja tanto bisogna almanco ogni diese tochi fàrghene un paro de mone! Alora sì che podaremo dire de aver otegnuo un risultato parfeto!
Co se dise povertà!
Tra i me ricordi de quando gero bocia, brila quelo de un circheto gestìo da pori cani che ogni tanto piantava le tende su un canpo darente casa mia e che proponeva spetacoleti da sbochi de sangue co l’unico scopo de ciapare un franco utile a sopravìvare e a mantegnere le quatro bestie rognose che seviva da atrassion par el popolasso: tratàvasi de na tigre de sirca dosento ani, sensa denti, scarsa de pelo e afeta da moroidi giganti, na strussa spenotà tegnua pì che altro par la produssion de giganteschi ovi, un sarpente pitone totalmente incapace de inténdare e volere in quanto omagià più volte al giorno de solene bastonà in testa e un cavalo bolso e stitico. Ma par farve capire mèjo quanto poareto che fusse el paron pensè che la Dona Canone gera anoressica e pesava trentasinque chili e che quelo che vegneva presentà come l’el nano più grando del mondo gera alto un metro e sinquantadò!
Gusti sessuali e dieta
Da che mondo ze mondo gò senpre sentio dire che l’omo ze caciatore e la fémena ze la preda… La metafora gera giusta fin qualche ano fa. Desso, purtropo noto che na bona parte dei òmeni ze deventà vegetariani e più che altro i vien mati par i fenoci!
|
