Riflessioni del 19/07/2006
UN PRETE EBETE MIGA POCO!
Tenpo indrìo, in un paeseto qua darente, ze morto un vecioteo, umile, porocan e anonimo. Ma che comunque, nela so umiltà, gera na brava e onesta persona. Sicome el gera un me parente ala longa ( questi ze i parenti che apresso de più) go pensà che fusse giusto che partecipasse al so funerale. Cussì me so presentà in ciesa e go deciso na volta tanto de sfidare l’alergia teribile che go par sto posto. Bon, taca la cerimonia co poca zente, sensa fiori e sensa la deprimente musica de organo che de solito indormessa mèso publico.El prete taca el discorso e el esordisse cussì: - Cari frateli, siamo qua ogi co due tristi avenimenti: prima el tenpo ze bruto, piovisina, e ghe ze nebia. Secondo fasemo el funerale al poro Tilio Capeta che ga lassà sta vale de lagreme...etc...etc... - Putama bestia so stà romaso!!! La prima reassion sarìa stà quela de alsarme in piè e sigare:
- E no, caro Paroco, el se sbalia: i avenimenti tristi ancò i ze tre: primo ze morto Tilio, secondo fora piove e terso in sto paese gavemo scoperto de avere par prete un mona!!!
Invesse no: so ‘ndà fora parché go tacà straunare a tonfon. Un ataco de alergia che no ve digo!!!
N.D.A. fato scrupolosamente vero!!!
BECO E MONA!
Sorpresa stupenda
Sinque de matina e un guardian noturno co na gran facia da mona torna casa dal lavoro. Sto facia da mona entra in casa pian pianeto e par no svejare la mojere el se cava le scarpe e i vestiti man man che el se avissina ala càmara da leto.. Su quelo che el ze drio entrare se verse la porta e dala càmara vien fora un giovinoto in màneghe de mudande... El guardian ze drio vérzare boca par dimandare spiegassion ma el giovinoto lo anticipa:
- Te la go lassada bela calda, caro... comunque serca de fare presto parché fra poco riva casa el facia da mona de so marìo....
MONA DOC
Do amissi se rincontra e uno dise: - Ze proprio vero che le fémene ze senpie... me mojore po’ ghe ne ga conbinà una tuta da rìdare... - Contame, contame - salta su st’altro. - Beh, pensa che sta sema de na salvàdega la setimana passà la ga ritirà diese milioni in banca e la ze ‘ndà conprarse na Panda... ahhh ahhhh ahhhhh... che rassa de ebete par Dio!!! - A vardare ben - risponde l’amigo - mi no la me pare na mossa cussì stolta: la gavarà avù voja de réndarse indipendente... - Ma che casso disito? Me mojere no la ga gnanca la patente... ahhhgrrr.... ahhhhhh... me disito che minchia se ne fa dela Panda?!? - Ah beh, alora... ma, caro mio me mojere la bate la tua... pensa che me ga dito el farmacista che sta macaca ogni setimana se conpra na scatola de goldoni-preservativi atù setebelo co serbatoio.... Ma digo mi, cossa se ne farala se no la ga gnanca l’oseo?!?... ahhhhh... ahhhh... ahhhh...
|
|
