Riflessioni del 23/06/2006
Vietata ai minoreni
Pierino ze in spiaja insieme a so pare e so mare. El bocia core de qua e de là de baucon scavando buse e inpaltanandose come un porseo fin che so mare fa el bagno ... A un serto punto el abandona l'aqua e torna da so pare soto l'onbrelon:
- Popà, - el taca criare - vojo un materassin fato a bagnin!!!
- Me despiase bocia, - risponde el pare gongolando - ma stavolta te toca incartàrtela... no esiste un stramassin fato a bagnin!!!
- Sì ch'el ghe ze, - fifota Pierino - e mi lo vojo... ghe ne vojo uno subito...
- Te gò dito che el stramassin fato a bagnin no ghe ze... - siga so pare - ghe ze quelo fato a pessecan, quelo fato a letin... quelo a cucodrilo... quelo a bagnin no ghe ze... Giuda can... e desso basta!!!
- E invesse el ghe ze... e mi lo vojo... subito senò inpianto na nosa che no finisse più... vojo el materassin fato a bagnin...
- Basta, par Dio... - strepita el pare paonasso - te gò dito ch'el no'l ghe ze!!!... Vuto capirla sì o no???
- E invesse el ghe ze... anca massa... gò visto pena desso, dadrìo un mucio de sabion, me mama co la valgola in boca drio gonfiarghene uno!!!!
DEFINISSION INTELIGENTI
Berlusconi: tanti dise che el ze basso: no ze vero. Come nano el ze sula media!
Bigamia: tentativo de risòlvare un problema creandóghene n'altro
Biscardi: più me spiego, manco me capisso!
Guinzaglio: toco de corda che parmete ai cani de menare in giro de baucon le vecete
Lapidare: rinproverare co le piere
Logica: casa mia ze piena de formighe parché nissun ze sta bon de inventare preservativi picolissimi!
Lupara: calcolatrice del mafioso
Matrimonio: duelo a cornade
Mèdego specialista: uno che ga fortemente ristreto el canpo dele so incapacità!
Ossio: el più economico e riposante dei vissi
Pedone: omo che ga na màchina ma anca un fiolo de disdoto ani!
Peocioso: quelo che denuncia la "miseria stabile", finisse i schei e vansa un poco de mese
Sior: quelo che denuncia la "richessa mobile", finisse el mese e vansa un pochi de schei
Riflession: ze vero che la paura fa novanta, ma me nono ga tacà strénzare le ciape a sessanta!
Ronchesamento: l'ùnica vera musica da càmara
Ronchesare: dormire a alta vosse
Suicida: un depresso che ga pressa
Urologo: mèdego che pensa senpre ai cassi dei altri
20 anni: el vien duro par gnente
80 ani: no'l vien par gnente duro!
ANEDOTI DAL MONDO DEI TACAMALTA
L'inpresario edile Neno Culata culturamente ze na sopa: cavà el balon e le corse de màchine del resto no sa gnente, ansi manco de gnente. La mojere, che ze un fià manco sopona, sofre e ghe tegnarìa ogni tanto frequentare el teatro par miliorare la so stitica cultura e fare la so figura co le amighe... Forsa de fàrghene dopo ani de lote la riesse a convìnsare l'omo a conpagnarla a teatro "La Perla" a Toreja.
I do riva par tenpo, se posta in prima fila e speta. Se stua le luci e va su el spetacolo. Neno Culata sarà i oci e pisoca par la prima mezaoreta... dopo el se sbauca fora un fiatenin e se mete vardare el via vai sul palco. Ogni tanto sotolinea la so atenssion co na bela sganassada sonora... A un serto punto la mojere ghe pianta un gumìo sule coste e la ghe borbota drio:
- Ciò ghe la molito de fare el mona?... cossa ghe catito tanto da ridare su l'Amleto???
- l'Amleto?!?... dise Neno tuto stupìo - e chi zelo??? Ostaria, no'l ze miga un spetacolo dele Bronse Querte???
|
